في دوريات كتير بنشوف الفريق اللي رايح يلعب بره ملعبه بيبقى اغلب الجماهير في المدرجات من الفريق المستضيف وكل نادي له جماهيره من المحافظة بتاعته او المدينة اللي النادي تابع ليها
وده موجود في مصر في محافظات معينة واشهرها بورسعيد للنادي المصري والاسماعيلية للنادي الاسماعيلي وبنلاقي الملعب كله متقفل بجماهيرهم والمحافظتين معظمهم بيشجعوا اندية بلدهم ... لكن لفت نظري كمواطن سكندري ان معظم شباب اسكندرية منقسمين ما بين الاهلي والزمالك وبنشوف روابط التراس مشجعين للاهلي والزمالك داخل اسكندرية ديفلز ووايت نايتس.
وده بيبقى باين في القهاوي والكافيهات بشكل واضح عكس مباريات الاتحاد السكندري كتير من القهاوي مش بتشغلها اصلا ولو سالت اي مواطن سكندري عن اسم مدرب الاتحاد او الاوليمبي محدش حيعرف غير القليل اوي .... هل لان اسكندرية محافظة كبيرة وكتير من اهلها دلوقتي جايين من محافظات تانية وبيشجعوا الاهلي او الزمالك .. لان معظم جماهير الاتحاد بتبقى في مناطق معينة شعبية معظم سكانها من اسكندرية اساسا؟؟
ونفس الكلام على محافظات تانية الغربية والشرقية والبحيرة واندية الصعيد كله بقى اهلي يا زمالك ورابطة محبين الاهلي والزمالك في كل محافظة هناك طيب واندية بلدك ومحافظتك!! ولو جيت سالت اي مواطن منهم واخبار نادي بلدك ايه؟؟ مش حيعرف اي حاجة عنه وممكن الجواب بيكون بطريقة فيها سخرية من نادي بلده وانه مبيكسبش ! طيب هل احنا المفروض نشجع الفريق اللي بيكسب؟؟ يبقى كده مصر لو لاعبت البرازيل نشجع البرازيل لانها الاقوى واللي بتكسب!!
طبعا انا مش عايز اتكلم في موضوع ان في ناس دلوقتي من الجيل الجديد مش بتتفرج على الدوري المصري اساسا ولا بتشجع اي نادي داخل مصر وانتماءهم لاندية اوروبا لا ومتعصبيين كمان!!
والموضوع مبقاش في كورة القدم بس ده تحول كمان للصالات المغلقة وفي العاب هو مش عارف قوانينها ايه ولا عارف مين اللي بيلعب ومع ذلك تلاقي جماهير هناك ورا الاهلي والزمالك في كورة اليد او الطائرة او السلة او العاب فردية.